وفاقی وزیر اطلاعات و نشریات عطاء اللہ تارڑ نے کہا ہے کہ سوشل میڈیا پلیٹ فارمز پر مؤثر حکمت عملی کے تحت فیکٹ چیکنگ کا مضبوط نظام قائم کرنا وقت کی ضرورت ہے۔ انہوں نے کہا کہ فیک نیوز آج دنیا کا سب سے بڑا چیلنج بن چکی ہے اور اس کا مقابلہ کیے بغیر ڈی ایٹ کے رکن ممالک کے مشترکہ بیانیے کو مضبوط نہیں بنایا جا سکتا۔
یہ بات انہوں نے سیکریٹری جنرل ڈی ایٹ برائے اقتصادی تعاون، ایمبیسیڈر اسیاکا عبدالقادر امام سے ملاقات کے دوران کہی۔ ملاقات میں ڈی ایٹ رکن ممالک کے درمیان باہمی تعاون، میڈیا کے شعبے میں تعلقات، فیک نیوز اور دیگر اہم عالمی امور پر
تفصیلی تبادلہ خیال کیا گیا۔ اس کے علاوہ، ڈی ایٹ ممالک کے درمیان ثقافتی روابط کے فروغ پر بھی گفتگو ہوئی۔
وفاقی وزیر اطلاعات نے کہا کہ عالمی سطح پر اقتصادی ترقی اور خطے کے امن کے لیے ڈی ایٹ کے سیکریٹری جنرل کا مؤثر کردار قابل ستائش ہے۔ ان کی رہنمائی اور تجربے سے ڈی ایٹ کے مقاصد کی تکمیل میں بھرپور کردار ادا کیا جا سکتا ہے۔
انہوں نے مزید کہا کہ فیک نیوز پر مکمل کنٹرول کے بغیر ڈی ایٹ ممالک کا مشترکہ بیانیہ مضبوط نہیں ہو سکتا، اور انہیں اپنی متفقہ میڈیا پالیسی کے ذریعے غلط معلومات کا مقابلہ کرنا ہوگا۔ ثقافتی تعاون سے خطے میں ہم آہنگی پیدا کی جا سکتی ہے اور مثبت عوامی امیج قائم کیا جا سکتا ہے۔ ثقافت، ابلاغ اور ٹیکنالوجی کے اشتراک سے ڈی ایٹ ممالک کے عوام کو مزید قریب لایا جا سکتا ہے۔
اس موقع پر سیکریٹری جنرل، ایمبیسیڈر اسیاکا عبدالقادر امام نے کہا کہ ڈی ایٹ کے رکن ممالک کی کامیابی اس بات پر منحصر ہے کہ وہ ایک دوسرے کی ترقی میں کس حد تک معاون ثابت ہوتے ہیں۔ انہوں نے زور دیا کہ میڈیا کے شعبے میں ایک دوسرے کے تجربات سے سیکھنے، مشترکہ تربیت اور ورکشاپس کا انعقاد ناگزیر ہے۔ اس کے ذریعے عالمی سطح پر ایک مضبوط اور مثبت بیانیہ تشکیل دیا جا سکتا ہے اور ڈی ایٹ کے پلیٹ فارم پر تعاون کو مزید مستحکم بنایا جا سکتا ہے۔